Големиот пад на цената на нафтата, од која зависат државите од Персискиот Залив, претставува можност за укинување на субвенциите и за спроведување на реформи, порачаа министрите на овие земји кои учествуваат на Светскиот економски форум во Давос.
– Сега е вистински момент за укинување на субвенциите за нафтените производи, поради падот на цената на нафтата – изјави кувајтскиот министер за финансии и министер за нафта, Анас ал Салех, на панел-дискусијата за иднината на економските реформи во арапскиот свет.
Истовремено, министерот за енергетика на Обединетите Арапски Емирати, Сухаил ал Мазруеј, порача дека земјите од Персискиот Залив мора да размислат за спроведување клучни реформи, за да креираат поголема независност на сопствените буџети од приходите од нафтата.
Меѓународниот монетарен фонд неодамна апелираше до државите од Персискиот Залив да ги намалат трошоците за субвенции, бидејќи нивните буџетски приходи значително се намалени.
Цената на нафтата за година и пол изгуби 75 проценти од вредноста, поради прекумерните глобални резерви, слабата побарувачка, големото производство и забавувањето на порастот на глобалната економија, наведува агенцијата „Франс прес“.
