Европскиот комесар за финансии, Пјер Московиси, денеска изјави дека Европската комисија во април ќе предложи, финансиските податоци на мултинационалните компании во земјите на Европската унија да станат достапни за јавноста.
– Секоја мултинационална компанија треба да ги објавува своите активности, резултати, финансиски и сметководствени податоци во секоја земја поединечно – изјави Московиси за радиото „Франс антер“.
Тој истакна дека Организацијата за економска соработка и развој ја одредила нормата што Унијата ќе ја преслика на европско ниво, а подразбира дека сметководствените и финансиските податоци ќе бидат достапни на фискалните управи на поединечни земји на Унијата, што сега не е случај.
Комисијата сега спроведува студија за тоа какви последици би можело да има откривањето на финансиските резултати на мултинационалните компании за јавноста, чијшто заклучок ќе биде подготвен во март.
– Ако тоа влијае врз конкурентноста, а верувам дека нема, ќе ја преземеме иницијативата во април – изјави Московиси.
