Во второто коло од натпреварите по групи, македонската кошаркарска репрезентација денеска ја совлада селекцијата на Холандија со резултат 78 – 71, со што ја забележа првата победа на Европското првенство, кое се игра во Хрватска, Германија, Летонија и во Франција.
Македонските кошаркари имаа одлична реализација на шутевите за три поени, што, всушност, беше нашето главно оружје на натпреварот за кое Холанѓаните не успеаја да најдат решение.
Најефикасни во нашиот тим беа Владо Илиевски со 14 поени, а Бојан Тајковски и Александар Костовски додадоа уште по 13 коша. Кај селекцијата на Холандија најпрецизен беше Николак де Јонг со 19 поени.
За тимовите од нашата група Ц утре е слободен ден, а натпреварите продолжуваат во вторник, кога македонската репрезентација се среќава со домаќинот Хрватска.
