Министрите за надворешни работи на земјите-членки на Европска Унија се согласија да го прошират списокот на украински и на руски функционери на кои им е забранет престојот и работењето во ЕУ.
Шефовите на дипломатијата ја повикаа Москва да престане да дава воена и дипломатска помош на проруските сили во Украина.
„По согледувањето на ситуацијата на теренот, Советот побара од Европската служба за надворешни работи до крајот на месецот да ја прошири листата на целни мерки кон сепаратистите“, стои во соопштението на Европскиот совет, издадено денеска во текот на министерскиот совет во Брисел.
Засега не е јасно дали налогот се однесува само за украинските лидери кои застанаа на страна на проруските сили или ќе ги опфати и руските функционери.
Постојните санкции засега опфаќаат забрана за издавање виза за 119 руски и украински функционери и 23 претпријатија на кои им е забрането работењето во ЕУ.
