Европската комисија против расизам и нетолеранција (ЕЦРИ) при Советот на Европа во својот најнов извештај за Македонија, објавен на 7 јуни, оценува дека во земјава постојат прашања што предизвикуваат загриженост и ги повикува политичките лидери јавно да го осудат говорот на омраза.
Во извештајот се истакнува дека и покрај напредокот на одредени полиња изминатите неколку години, сепак Кривичниот законик на земјава сè уште не ги исполнува препораките на ЕЦРИ за борба против расизмот и расната дискримнација, а недостатоци и празнини има и во рамките на граѓански и управни законски одредби.
„Етничките тензии помеѓу двете најголеми заедици во земјата се високи и говорот на омраза на расна основа е широко распространет проблем, кој останува во голема мера игнориран што креира атмосфера во која може да се случи насилство на расна основа“, се наведува во извештајот.
Racism/intolerance in MK: COE report calls on leaders to condemn hate speech publicly. Surely an easy win for MK? https://t.co/PkRGGtOjcL
— Charles Garrett (@BritAmbCGarrett) June 14, 2016
Во него, се додава дека степенот на нетолеранција кон ЛГБТ-лицата е на алармантно високо ниво и нема ефикасна превенција на насилството и на омразата кон овие лица и казни од страна властите.
Ситуацијата со ромската заедница во земјата и понатаму е тешка, со високо ниво на социоекономска маргинализација, особено во областа на едукацијата, вработувањето, домувањето и на здравството.
Во извештајот, исто така, се нотира и неможноста на неколку религиозни заедници, особено од православна вера (најверојатно се мисли на Православна охридска архиепископија на Јован Вранишковски – н.з.) да се регистрираат како верска заедница во земјава.
Од ЕЦРИ, покрај пополнувањето на празнините во Кривичниот законик и на граѓанските и управните законски одредби, од властите во земјава бараат јавно да го осудат говорот на омраза од страна на високи државни службеници и политичари.
„Сите политички партии во земјата треба да го осудат говорот на омраза и да ги повикаат своите членови и симпатизери да се воздржат од негова упореба. Властите треба да ги прошират постоечките обуки за расистичко и за хомофобично насилство за полицијата и за судството. Во насока на решавање на проблемот околу непријавувањето случаи, властите треба да имплементираат мерки за градење доверба и за зајакнување на врските меѓу полицијата и ранливите групи, особено со ЛГБТ-заедницата“, стои во извештајот на ЕЦРИ.
