ЕСМ Снабдување со топлина информира дека е во тек изработката на фактурите за топлинска енергија за месец октомври. Од ЕСМ велат дека во законска постапка ја преземале целокупната база на податоци потребна за изработка, достава и наплата на фактурите, вклучително и личните податоци за потрошувачите на централниот систем за греење и сопствениците на посебен дел во станбени, станбено-деловни, деловно-станбени и деловни објекти лоцирани на подрачјето на општините Аеродром, Гази Баба, Ѓорче Петров, Карпош, Кисела Вода, Центар и Чаир во Скопје.
„Правниот основ за преземање на целокупната база на податоци вклучително и личните податоци за потрошувачите потребни за вршење на дејноста снабдување со топлинска енергија произлегува од обврската за вршење јавна услуга согласно Законот за енергетика како и Одлуката за давање на лиценца за вршење на дејност снабдување со топлинска енергија на друштвото ЕСМ Снабдување со топлина ДООЕЛ Скопје, а со цел обезбедување на континуитет односно непрекинато вршење на енергетската дејност и заштита на јавниот интерес“, појаснуваат од ЕСМ Снабување со топлина.
Минатиот месец новиот снабдувач објави дека потрошувачите треба да склучат нови договори за парно греење со ЕСМ Снабдување. Иако за два дена почнува декември, граѓаните сè уште ги немаат добиено октомвриските сметки за парно греење.
