АД ЕСМ информира дека од синоќа во 2:45 часот Блокот 2 во РЕК „Битола“ е синхронизиран во електроенергетскиот систем на земјава. Производството на електрична енергија продолжува и од Блокот 1, така што најголемиот енергетски капацитет во земјава од денеска практично работи со два од трите блока.
„На депонијата за јаглен во РЕК „Битола“ во моментов има доволно јаглен за континуирано производство на електрична енергија за потребите на домаќинствата, а количините се надополнуваат и се зголемуваат во континуитет“, информираат од АД ЕСМ.
Од Електрани на Северна Македонија велат дека стручен тим составен од вработени во РЕК „Битола“ и во енергетските компании од земјава продолжува со напорите за оспособување на трансформаторот на Блок 3, кој беше оштетен во пожарот од пред десет дена.
