Турскиот претседател, Реџеп Таип Ердоган, денеска ги обвини европските земји дека Средоземно Море го претвориле во „гробница на бегалци“, реагирајќи на фотографијата на малиот сириски бегалец пронајден удавен на брегот на Турција.
– Пронајдено е тело на тригодишно дете на наша плажа. Зарем човештвото не би требало да сноси одговорност? – рече турскиот претседател во пресрет на состанокот на министри и на гувернери на централните банки на земјите од групите Г20.
Ердоган потсетува дека неговата земја примила околу два милиони сириски бегалци од почетокот на војната во Сирија во 2011 година.
Фотографијата од малиот Ајлана Курди како лежи мртов на плажата кај Бодрум го обиколи светот. Неговиот постар, петгодишен брат и мајка му, исто така, починале.