Јавното претпријатие „Лајка“ во наредните 30 дена нема да заловува бездомни кучиња од скопските улици освен оние кои се пријавени за агресивни или кои каснале граѓани, соопштија од „Лајка“. Оваа одлука е донесена откако на почетокот на декември била констатирана појава на инфективна болест штенечак – кучешка чума кај пет заловени кучиња.
„Станува збор за вирусно заболување од високозаразна природа кое пред неколку месеци се појави и на улиците во Скопје, исклучително ризично по животот на заловените кучиња, без никаква опасност по здравјето на луѓето“, велат од Лајка.
Од претпријатието тврдат дека по констатирањето на првите случаи, согласно стручните ветеринарни препораки и насоки, преземени се низа превентивни мерки, меѓу кои и забрана за заловување и враќање на бездомни кучиња во период од 30 дена, поради долгата инкубација на болеста и поради опасност кучињата да пројават знаци на болеста веќе откако ќе бидат вратени на локација. Во периодот од 30 дена во стационарот ќе се прифаќаат само кучиња кои се пријавени за агресивни или кои каснале граѓани.
„Во моментот сме под карантин, со што сме спречени активно да работиме на решавање на проблемот со уличната популација на кучиња. Застојот на програмата залови – стерилизирај – вакцинирај – врати ќе биде бргу надоместен во наредните месеци, но во моментов е недозволиво да се импровизира. Мерките кои се преземаат во овој период се неопходни и од исклучително важност, со цел да превенираме ширење на болест која е подмолна и фатална по здравјето и животот на кучињата“, велат од ЈП „Лајка“.
Штенечакот е заразна болест предизвикана од вирус кој ги напаѓа респираторниот, гастроинтестиналниот и нервниот систем кај млади, но и кај возрасни кучиња, која доколку навремено се детектира и се третира соодветно, може да се излечи. Кучињата најчесто се инфицираат преку кивање и кашлање од заболено куче.
