Екологистите бараат скопските топлани да не работат со дизел оти воздухот и без тоа е загаден

Комбинираната електрана ТЕ-ТО Скопје | Фото: Мета.мк

Еколошките организации не се согласуваат во скопските топлани да се експериментира со дизел гориво. Екологистите реагираат на информациите од АД ЕСМ за тестирање на нови мотори со дизел гориво во топланите Исток и Запад во Скопје по 15 ноември и ги оценуваат како несериозни и непотребни во услови кога природниот гас е опција како енергенс за овие топлани.

„Објавата дека во топланите се инсталирани 10 нови пумпи за дизел кои ќе се тестираат по десет дена во секоја топлана е краткорочно решение кое е спроведено нетранспарентно, а ќе донесе долгорочни штетни последици по здравјето на граѓаните на Скопје“, велат од Центарот за истражување и информирање за животна средина „Еко свест“.

Во очи на втората зима во која се соочуваме со енергетска криза, еколошките организации апелираат одлуките што се носат за нејзино надминување да бидат транспаренти и да носат придобивки на долг рок за да не се повтори кризата и наредната година. Заштитата на јавното здравје и животната средина исто така секогаш треба да бидат приоритет во носењето на ваквите одлуки.

Топланите Исток и Запад во моментов имаат дозвола да работат само со природен гас. Воведената промена, велат екологистите, е целосно различна од нивниот нормален режим на работа и претставуваа создавање нова постројка со сосема нови параметри. Топланите немаат опрема за контрола на емисиите од користење на дизел гориво, немаат ниту еколошка дозвола која што овозможува такво нешто, а сега не чека ситуација каде што 20 денови ќе се користи дизел за загревање на Скопје.

„Од почетокот на ноември веќе секојдневно се надминуваат дозволените вредности на загадувањето на воздухот во Скопје, кое во некои денови е и двојно повисоко од дозволеното. Со користењето на дизел во топланите, дури и само во овој тест период, загадувањето уште повеќе ќе се зголеми“, смета Давор Пехчевски, координатор за енергија во Еко-свест.

Веќе постојат технолошко и финансиски лесно достапни алтернативи за загревање на домаќинствата што користат обновливи извори на енергија. Инвестициите мора да се пренасочат во овие технологии за да се добие истиот ефект, но без загадувањето на воздухот. Дополнително, на овој начин ќе се избегнат последиците од енергетската криза на долг рок наместо да остануваме зависни од увоз на скапи и високо загадувачки горива.

„Апелираме дека здравјето на граѓаните нема цена, а кризната состојба не е причина да се носат ад хок решенија, посебно кога во моментот цената на гасот паѓа, а го има како енергенс. Во вакви услови нема потреба ниту за тестирање, ниту пренасочување на производството на дизел со што значително ќе се загади воздухот во Скопје. Истовремено, бараме од Владата и институциите транспарентно да ги носат одлуките за надминување на кризата и пошироко да се консултираат за да се изнајдат најдобрите решенија. Финансиските инвестиции треба да служат за енергетска трансформација, а не за навраќање кон застарени, одамна надминати и загадувачки технологии, велат од „Еко свест“.