Во изминатите 24 часа, Министерството за внатрешни работи (МВР) издало потврди за искажана намера за барање азил на вкупно 427 мигранти, кои илегално влегле на македонска територија.
Според МВР, во текот на вчерашниот ден, мобилните тимови на Црвен крст укажале прва помош на вкупно 204 лица, меѓу кои имало 30 трудници. Од интервенциите, 118 биле на железничката станица во Гевгелија, 86 на Табановце, а едно лице било транспортирано во гевгелиската општа болница.
Од 19 јуни, кога стапија на сила измените на Законот за азил и привремена заштита до денеска, во 8 часот, според МВР, потврди се издадени на вкупно 33.767 мигранти, од кои 26.561 се државјани на Сирија.
Бројот на мигранти што поднеле барање за азил останува непроменет, односно 41 лице поднело барање за признавање право на азил врз основа на претходно издадена потврда. Од барателите на азил, 31 се сириски државјани.
