На денешниот, 16-ти состанок на заедничкиот Комитет за стабилизација и асоцијација, кој го сочинуваат претставници на Северна Македонија и на ЕУ, претставниците на Европската Комисија упатиле охрабрување до сите политички партии и чинители во земјава да работат заеднички на одржувањето и зајакнувањето на политичкиот дијалог и да продолжат со исполнување на ЕУ-агендата, особено во поглед на судството, борбата против корупцијата и организираниот криминал, безбедносно-разузнавачките служби и јавната администрација, на сеопфатен и транспарентен начин.
Тоа го соопшти Делегацијата на Европската Унија во Скопје, порачувајќи дека Европската Комисија (ЕК) силно ја нагласила важноста на одржувањето на темпото во прилагодувањето на националното законодавство со законодавството на ЕУ.
Со денешниот состанок заеднички претседавале Џеновева Руиз Калавера, директор за Западен Балкан во Директоратот за европска соседска политика и преговори за проширување при ЕК, и Калинка Габер, државен секретар во Секретаријатот за европски прашања.
На состанокот на кој се разгледувале актуелните состојби во Северна Македонија во поглед на исполнувањето на политичките и економските критериуми, обете страни ги поздравиле постигнувањето на Преспанскиот договор и Договорот за добрососедски односи со Бугарија, се дознава од соопштението.
Притоа бил поздравен напредокот во ЕУ реформите, посебно во областите опфатени со владиниот план „3-6-9“ и Планот 18.
На својот Твитер-профил, Калавера го посочи Преспанскиот договор како постигнување без преседан и пример за регионот и пошироко.
#Prespa agreement = an unprecedented breakthrough. This + bilateral treaty with 🇧🇬 set a positive example for the region & beyond. I reaffirmed the @EU_Commission’s recommendation to open accession negotiations with🇲🇰. Important for 🇪🇺 to deliver by October! @EUCouncil 2/2 pic.twitter.com/ys583Q7zyk
— Genoveva Ruiz Calavera (@CalaveraRuiz) June 20, 2019
„Ја повторив препораката на ЕК да се отпочнат пристапни преговори со Македонија. Важно е ЕУ да исполни до октомври“, напиша таа.
