Европската федерација на новинари (ЕФЈ) упати писмо до еврокомесарот за проширување и за соседска политика, Јоханес Хан, во кое изразува сериозна загриженост за состојбата со слободата на медиумите во Македонија.
„Еден од итните приоритети од Договорот од Пржино е реформата на медиумите и слободата на изразување во Македонија за да има слободни и веродостојни избори, како апсолутен услов за демократски избори. Заедно со нашите локални членки, ние сме сериозно загрижени дека ЕУ не е целосно конзистентна во своите изјави за реформите на медиумите. Од оваа недела, ЕУ престана да инсистира дека е потребно да се случат реформи за медиумите пред изборите, кои се презакажани на 5 јуни. Ние сме убедени дека ако не го искористиме овој момент за спроведување на медиумските реформи, кога сите потписници се на преговарачка маса, ќе пропуштиме одлична можност да имаме сериозни промени, кои сите ние ги чекаме толку долго, а се од клучно значење за Македонија и за регионот. Тешко е да се има фер избори кога главните медиумите се под директно влијание на владата“, се вели во писмото.
Од Европската федерација на новинари го повикаа Хан да изврши притисок врз владата за реформите во медиумите да се случат пред изборите. Според нив, тоа е единствениот начин да се ослободат медиумите од политичкото влијание на владата како услов за професионално известување за претстојните избори.
