Лидерите на Европската Унија ги усвоија насоките за преговорите со Велика Британија за нејзиното напуштање на Унијата, изјави претседателот на Европскиот совет, Доналд Туск.
Краткиот самит на лидерите на 27-те земји членки беше одржан во Брисел, без британската премиерка Тереза Меј.
Се очекува преговорите на двете страни, кои би требало да траат две години, да почнат по парламентарните избори во Велика Британија, кои ќе се одржат на 8 јуни.
– Насоките се усвоени едногласно. Доделен е силен и јасен политички мандат за преговори за Брексит – рече Туск.
Лидерите на ЕУ ветија дека ќе се држат заедно и предупредија дека цврсто ќе се однесуваат спрема секое барање на британската премиерка.
Односите на Велика Британија и на Ирска по Брексит станаа како клучно прашање што треба да се реши во преговорите, како и прашањата за границата помеѓу Ирска и Северна Ирска.
