Основното јавно обвинителство Тетово, во координација со СВР-Тетово, презеде дејства за расветлување на вчерашниот ицидент во кој при обид за лишување од слобода на осуденик, беа нападнати и повредени четворица полициски службеници.
При вршење на увидот на местото на настанот, пронајдени се, фотодокументирани и подигнати се за вештачење повеќе траги, а се преземаат и мерки за пронаоѓање на напаѓачите.
„Во текот на ноќта, во полициска станица во Тетово е приведен и задржан еден 36-годишен тетовец Е.Ј., за кој постои сомнеж дека учествувал во кривично-правниот настан и спречил службено лице во извршување службена должност. Настанот се случи вчера попладне, кога четворицата полициски службеници се обиделе да го лишат од слобода 40-годишниот И.И., кој се барал за издржување едногодишна затворска казна. Тој се спротивставил и им дал отпор, а потоа со неговиот татко 69-годишниот А.И. и уште две лица физички ги нападнале полицајците. Таткото во нападот користел и метална прачка, со која на двајца полициски службеници им нанел тешки, а на другите двајца полесни телесни повреди“, велат од Основното јавно обвинителство.
Потешко повредените полицајци биле префрлени на скопските клиники, каде врз еден е извршен и хируршки зафат и тој се наоѓа во животно-загрозувачка здравствена состојба.