Едно лице загина откако земјотрес со јачина од 7,4 степени го погоди индонезискиот остров Тернате, оштетувајќи згради и предизвикувајќи мали цунамски бранови, пренесува Гардијан.

Земјотресот, кој бил на длабочина од 35 километри, се случил во четврток во 6:48 часот по локално време, според Геолошкиот институт на САД. Неговиот епицентар бил на 127 километри западно-северозападно од Тернате, остров во индонезиската покраина Северен Малуку.

Американскиот систем за предупредување од цунами првично алармираше за опасност од цунамски бранови во радиус од 1.000 километри од епицентарот, вклучително и долж бреговите на Индонезија, Филипините и Малезија, наведувајќи дека на делови од индонезиското крајбрежје се можни бранови од 0,3 до 1 метар над нивото на плимата.

Околу два часа по земјотресот, системот потврди дека заканата од цунами поминала.

Силно тресење што траело од 10 до 20 секунди било почувствувано во Битунг – крајбрежен град на североисточниот раб на островот Сулавеси – и околните области, како и во градот Тернате, според индонезиската агенција за управување со катастрофи (BNPB).

Според индонезиската метеоролошка агенција BMKG, цунамски бранови биле регистрирани на пет локации, при што највисокиот – од 0,75 метри – бил забележан во Северна Минахаса, во покраината Северен Сулавеси. Регистрирани биле вкупно 11 последователни потреси, од кои најсилниот бил со јачина од 5,5 степени.

Властите ја повикаа јавноста да остане внимателна. „Во оваа фаза, и натаму е потребна претпазливост, особено кај заедниците што живеат долж брегот“, изјави портпарол на BNPB во соопштение, повикувајќи ги жителите да не се враќаат на плажите или во крајбрежните области сè додека властите не потврдат дека тоа е безбедно.

70-годишна жена загинала во округот Минахаса во Северен Сулавеси, а уште еден жител бил повреден по земјотресот.

Снимки покажаа оштетен спортски комплекс во Северна Суматра, со искривени ѕидни панели и метални шипки расфрлани по земјата надвор од објектот.

BNPB соопшти дека првичните проценки покажуваат „мала до умерена“ штета на зградите во делови од Тернате, кој има население од околу 205.000 жители. Оштетена била една црква во округот остров Батанг Дуа, како и две куќи во Јужен Тернате. Во Битунг, проценката на штетите продолжувала, соопшти агенцијата.

Геолошкиот институт на САД првично го евидентирал земјотресот со јачина од 7,8 степени.

Јапонската метеоролошка агенција соопшти дека долж брегот на Јапонија може да има „мали промени на нивото на морето“, но дека не се очекува штета од цунами.

Филипинскиот институт за вулканологија и сеизмологија и Австралиското биро за метеорологија подоцна потврдија дека нема опасност од цунами за нивните територии.

Новинар на Agence France-Presse во Манадо, во покраината Северен Сулавеси, изјави дека тресењето го разбудило него и други жители во градот, кои излетале надвор. „Веднаш се разбудив и излегов од куќата. Луѓето веднаш почнаа да истрчуваат надвор“, рекол тој. „Има училиште и учениците исто така излегоа надвор.“

Тој рече дека тресењето траело „прилично долго“, но не видел „значителна штета“.

Индонезија, огромен архипелаг со повеќе од 280 милиони жители, е подложна на земјотреси поради својата положба на „огнениот прстен“, појас од вулкани и раседи во Пацифичкиот басен.

Во 2022 година, земјотрес со јачина од 5,6 степени усмрти најмалку 602 лица во градот Чианџур во Западна Јава, што беше најсмртоносниот земјотрес во Индонезија по потресот и цунамито во Сулавеси во 2018 година, кога загинаа повеќе од 4.300 луѓе.

Во 2004 година, исклучително силен земјотрес во Индискиот Океан предизвика цунами во кое загинаа повеќе од 230.000 луѓе во десетина земји, најголем дел од нив во покраината Ачех во Индонезија.

Овој дел од Молучкото Море често бележи умерени до силни земјотреси, според Геолошкиот институт на САД. Во изминатите 50 години, уште девет земјотреси со јачина поголема од седум степени се случиле во радиус од 250 километри од земјотресот во четвртокот, иако малку од нив предизвикале голема штета поради тоа што се случиле во морето.