Во овој кризен период, многу е важно да се заштитиме од дезинформациите за корона вирусот, кои што всушност се шират насекаде и тоа во голем број, особено во социјалните медиуми. За да не се соочиме со сериозни проблеми во иднина, што ќе произлезат поради некоја дезинформација, сега мора да посветиме особено внимание на точноста на информациите што ги добиваме.

На социјалните мрежи се шири пораката во која се вели: „Држете го здивот повеќе од 10 секунди. Ако успеете да го направите ова без кашлање или да не покажете знаци на вознемиреност или стегање во градите, тогаш не сте засегнати “.

Првото прашање што треба да се постави од каде испраќачот ја добил информацијата. Тоа може да е член од семејството, пријател кои можеби слушнале од наводни експерти од Јапонија. Но станува збор за дезинформација, луѓето шират информациите со намера да помогнат, без да сфатат дека тие се сепак жртви на дезинформација.

Дезинформациите на социјалните медиуми може да се шират многу брзо. Замислете кога дезинформацијата се шири во групи од десетици и стотици луѓе, а потоа секој од нив може да ја сподели со стотици и илјадници други. Дезинформација како онаа за употреба на лукот за да се спречи инфекцијата се рашири на „Фејсбук“, додека Светската здравствена организација реагираше со тврдење дека нема докази дека прекумерната употреба на лук може да ги заштити луѓето од коронавирус. Да претпоставиме дека оваа дезинформација се рашири во група од 200 члена на „Фејсбук“, а потоа половина од нив да ја дистрибуираат на 100 други лица. Значи, за неколку минути, дезинформацијата достигнува 10 илјади луѓе.

Друга широко распространета дезинформација беше онаа на пиење топла вода со лимон: „Професорот Чен Хорин, генерален директор на воената болница во Пекинг, рече: парчиња лимон во чаша врела вода може да ви го спасат животот. Топлиот лимон може да го убие ширењето на овој вирус во нашето тело!“

Оваа дезинформација беше широко распространета од разни луѓе на „Фејсбук“, преку пораки и други социјални медиуми, додека по неколку дена сериозни медиуми како што се „Еуроњуз“, „Асошиејтед прес“, АФП и др, објавија дека ова е уште една дезинформација која се шири во овој период. Во меѓувреме, познато е дека демантот на една дезинформација никогаш не може да го постигне истиот ефект, па затоа инфодемијата е важно да се запре пред да се сподели.

Во вакви случаи добро е да се биде скептичен во врска со информациите на кои сме изложени заради низа дезинформации што кружат на Интернет. Инфодемијата е „болест“ на непроверени информации што се пласираат во јавноста и овој „вирус“ може да се пренесе од една до друга личност. „Чистете ги рацете често“, за да расчистиме и да ја анализираме сите информации што ги добиваме, а пред да ги дистрибуираме, и затоа треба да си поставиме најмалку три прашања, што се најдобрата „вакцина“ против инфодемијата. Дали е изворот доверлив? Дали е оваа вест објавена во друг медиум? Дали е поддржана и од официјални извори?

За медицински совети, Светската здравствена организација, УНИЦЕФ и нашите државни институции, Министерството за здравство и Институтот за јавно здравје објавија разни и исцрпни упатства кои детално ги објаснуваат информациите за корона вирусот, затоа треба да се обратиме до здравствените институции било на државно или глобално ниво, и да не дозволиме да бидеме измамени од дезинформациите што кружат на социјалните медиуми, без разлика на тоа кој ги дистрибуира.

Значи, за пандемијата на коронавирус, вакцината сè уште не е пронајдена, но за инфодемијата веќе ја имаме „вакцината“, доволно е да се биде внимателен и да се „вакцинираме“ со горенаведените прашања за да се заштитиме од инфодемијата.