Според податоците на Државниот завод за статистика, во 2022 година, звањето доктор на науки го стекнале 197 лица, што претставува намалување за 2 отсто во споредба со 2021 година.
Најголем број од лицата, 31 отсто, докторирале во областа на здравството и социјалната заштита, потоа 17.8 проценти во бизнисот, администрацијата и правото, понатаму следат општествените науки, новинарството и информирањето со 10.2 проценти, и уметноста и хуманистичките науки со 9.1 процент.
99 жени одбраниле докторска дисертација во текот на 2022 година, што претставува нешто над 50 од вкупниот број лица што докторирале во истата година.
Најголемиот процент од вкупниот број лица што докторирале, односно 25.9 проценти, според ДЗС, ја вршат својата професија во дејностите на здравствената и социјалната заштита.
Звањето магистер на науки, пак, лани го стекнале 1.590 лица, додека 293 станале специјалисти. Во споредба со 2021 година, бројот на магистри и специјалисти е намален за 4.7 отсто.
Учеството на жените магистри во вкупниот број лица што го стекнале овој научен степен изнесува нешто над 61 процент.
Најголем дел од магистерските трудови, односно 38.4 отсто се од областа на бизнисот, администрацијата и правото, 18.5 проценти се од областа на инженерството, производството и градежништвото, по што следат општествените науки со 15.1 отсто.