Демократската унија за интеграција (ДУИ) денеска соопшти дека ја почитува одлуката на Стејт департментот на САД во врска со одлуката за ставањето на нивниот функционер Артан Груби на американската „црна листа“.
„Како партија, остануваме посветени на стратешката соработка со Соединетите Американски Држави и на зајакнување на демократските вредности и транспарентноста“, се вели во краткото писмено соопштение од ДУИ.
Поранешниот прв вицепремиер и висок функционер на ДУИ, Артан Груби заедно со судијата на Апелациониот суд Енвер Беџети се најновите имиња од Северна Македонија кои се најдоа на црната листа на САД.
На листата заедно со Груби се назначени и членовите на неговото потесно семејство.
Американската амбасадорка Ангела Агелер вчера напиша дека сместувањето на Артан Груби и Енвер Беџети на листата е доказ дека политичкото мешање во судството не може и нема да се толерира.
„Соединетите Држави ќе продолжат да ги именуваат оние кои се впуштаат во значителна корупција што ги поткопува демократските институции и ја нагризува довербата на јавноста. Никој не е над законот, а одговорноста е суштинска за напредок“, напиша Агелер.
