Средбата на потпретседателите ДУИ и на Алијанса за Албанците заврши, но ниту еден од претставниците на двете политички партии не соопшти детали од двочасовните разговори. Тие не открија какви предлози содржи документот испратен од лидерот на СДСМ, Зоран Заев, ниту пак дали е прифатлив за нив.
И од ДУИ и од Алијансата кратко информираа дека „разговарале за заедничката платформа“.
Со сличен став излезе и Арбен Таравари, кој додаде дека особено е важно да се имплементираат сите точки од заедничката платформа.
– Ги разгледавме сите точки на платформата на албанските партии. За нас како Алијанса за Албанците многу е важно да се реализираат сите точки на платформата без разлика кој ќе биде во таа комбинација на идната влада. За следните чекори ќе одговорат нашите лидери. Се надевам наскоро – рече секретарот на Движењето за реформи на ДПА, Таравари.
Алијанса за Албанците денеска најави лидерска средба на претседателите на ДУИ и Алијансата за Албанците, но ниту Али Ахмети, ниту Зијадин Села дојдоа. Наместо Ахмети, на средбата учествуваа потпретседателите на ДУИ Теута Арифи, Невзат Бејта и Изет Меџити, додека од Алијанса за Албанците беа Арбен Таравари, Агрон Ферати, Арта Точи и Флакрон Беџети. Ниту една од партиите не соопшти која е причината за промената на форматот на средбата.
Денеска во пресрет на средбата, од БЕСА соопштија дека досега немаат добиено покана за средба ниту од ДУИ, ниту од СДСМ. Тие рекоа дека се уште одобиваат да седнат на иста маса со ДУИ и оти веќе му ги понудиле потписите на СДСМ.
