Државниот завод за ревизија (ДЗР) денеска ги објави Конечните извештаи за извршена ревизија на Финансиските извештаи за 2018 година на СДСМ, ВМРО-ДПМНЕ и ДУИ. Забележани се неправилности околу недвижниот имот и тековите на парите, односно приходите и расходите, со акцент на уплатата на членарината.
За сите три политички партии е изразено мислење со резерва во однос на вистинитото и објективно прикажување на финансиските извештаи и усогласеноста на финансиските трансакции со релевантната законска регулатива, упатства и воспоставените политики, се наведува во Ревизорските извештаи.
Во Ревизоскиот извештај за сметката за редовно работење на СДСМ се вели дека дел од наследените градежни објекти се со нерешен сопственички статус и тие не се воведени во евиденција, а месечната членарина од секоја општинска организација во целосен износ се уплатувала директно на трансакциска сметка, поради што нема целосен увид и потврдување на поединечно уплатените суми.
Државните ревизори препорачуваат да се доуреди начинот на прибирање, уплата и известување за примените членарини, како и да се продолжи со утврдување на сопственоста и евидентирање на објектите.
Во извештајот за сметката на опозициската партија ВМРО-ДПМНЕ за 2018 година се нагласува дека во оваа година била поведена судска постапка за забрана за оттуѓување, ставање под хипотека или закуп на дел од недвижниот имот (се мисли на објектот на седиштето на партијата во Скопје), што не било евидентирано во деловните книги на партијата.
ДЗР исто така бара доуредување на актите за евидентирање и прикажување на приходите и расходите, како и изворите на финансирање на партијата ВМРО-ДПМНЕ, но и регулирање на уплатата и евиденцијата на членарини.
Во извештајот за сметката на ДУИ за 2018 година се вели дека за дел од фактури од добавувачи не е приложена соодветна поткрепувачка документација, а и не бил извршен попис на патничките возила што ги користи ДУИ врз основа на договори.
Ревизорите им препорачуваат на ДУИ да обезбедат комплетна документација како прилог на фактурите од добавувачите и да извршат попис на средства од друг субјект и означување на постојаните средства со инвентарни броеви.
