Се претпоставува дека институциите на локално и на централно ниво на компаниите им должат една милјарда евра. Ова денеска го истакна претседателот на СДСМ, Зоран Заев, на средбата со претставници од Стопанска комора на Северозападна Македонија (СКСЗМ).
Тој додаде дека има многу скриени долгови за кои не се знае, но вети дека во првите 100 дена од формирањето на новата влада, доколку СДСМ дојде на власт, ќе ја објават таа сума.
– Една од работите што ќе ја направиме е тоа што навремено ќе ги исполниме обврските кон компаниите и ќе ги расчистиме долговите што се трупале со месеци. Барањето за повраток на данокот на додадена вредност во оваа држава се смета за грев, наместо пари ќе си добиете инспекции – истакна Заев.
На новинарско прашање во однос на државните субвенции што странските компании ги добиваат во слободните економски зони, Заев истакна дека тие добиваат од 3.000 до 8.000 евра субвенции по вработен, што домашните компании ги става во подредена положба.
– Овие субвенции за странските компании ги ставаат во подредена положба домашните. Истовремено, им се овозможува да ги црпат ресурсите од домашните компании, односно да го привлечат веќе создадениот кадар. Во нашата економска програма предвидуваме 140 милиони евра за субвенции за домашните компании, кои ќе ги доделиме во следните четири години – истакна Заев.
Претставници од Стопанската комора на Северозападна Македонија денеска разговараа со лидерот на СДСМ, Заев, со Оливер Спасовски, Драган Тевдовски и со Петре Шилегов за економската програма на СДСМ, но и за платформата што оваа комора им ја претстави на политичарите пред претстојните избори за подобрување на економијата во земјата.
Претседателот на СКСЗМ, Неби Хоџа, истакнаа дека 80 проценти од барањата што ги имаат во платформата се и во економската програма на оваа партија.
– Побаравме реформи во јавните институции, поголема транспарентност на власта, отчетност, зголемување на домашниот бруто-производ. Зголемувањето на минималната плата на 16.000 денари и на просечната на 500 евра не е нереално доколку ни се овозможи тоа да го правиме во извесен период – додаде Хоџа.
Во однос на ова прашање, Заев рече дека бизнисмените ќе можат да ги зголемат просечната и минималната плата само ако државата создаде услови за тоа.
