Нов циклус од 17 поетски каравани ќе организира Друштвото на писателите на Македонија во 2015 година, во рамките на проектот за дисперзија на културните настани.
„Покрај договорената соработка за оваа манифестација со библиотеките во Гевгелија, Куманово и во Велес, со Домот на културата „Иван Мазов“ во Кавадарци, со литературните манифестации „Караманови средби“ во Радовиш и „Ганеви денови“ во Кожле, поетите, членови на ДПМ, ќе го продолжат караванот и во Струмица, Тетово, Битола, Прилеп, Штип, Лазарополе, Македонски Брод, Гостивар, Демир Хисар, Крушево и во Ресен“, се вели во соопштението од ДПМ.
Поетскиот караван ќе заврши со традиционалната манифестација „Средба на генерации“ во рамки на „Денови на Блаже Конески“, кои секоја година се одржуваат од 17 до 19 декември, денот на раѓањето на големиот македонски поет, основоположник и прв претседател на македонската писателска асоцијација. Во поетскиот караван на ДПМ ќе учествуваат 80 поети од сите генерации.
