Основното јавно обвинителство поведе постапка за управител на фирма, кој изградил шесткатница во Чаир на „Ќемал Сејфула“, без одобрение и на државно земјиште, соопштија денеска оттаму.
„Постапувајќи по кривична пријава од група граѓани, јавен обвинител од Основното јавно обвинителство Скопје изврши проверки и донесе Наредба за спроведување истражна постапка против едно лице за кривично дело – Бесправно градење од член 244-а од Кривичниот законик. Објектот почнал да се гради во 2024 година, без одобрение и на државно земјиште на улицата „Кемал Сејфула” во Чаир. Осомничениот, како управител на правно лице, се јавува како инвеститор на градбата – станбена зграда со деловни простории и катност По+П+6+Пк наменети за продажба“, се наведува во соопштението на Обвинителството.
Оттаму додаваат дека по наредба на јавен обвинител, овластен судски вештак од областа на градежништвото констатирал моментална фаза на изграденост, односно изведени армирано-бетонски работи, целосно избетонирана скелетна армирано-бетонска конструкција, столбови, греди и плочи од подрум до шестиот кат, како и ѕидање на надворешни и внатрешни ѕидови со блок тула.
„Јавниот обвинител до судијата на претходна постапка достави предлог за определување мерки на претпазливост – обврска да се јавува кај определено службено лице, привремено одземање на патната исправа и забрана за изведување градежни работи на објектот-дивоградба“, се наведува во соопштението.
Од пред неколку дена, градоначалничката на Скопје, Данела Арсовска, во повеќе наврати објавува видеа во живо на социјалната мрежа Фејсбук директно од Чаир, а во едно од нив зборуваше дека конкретната шесткатница е дивоградба и го повикуваше на одговорност градоначалникот на Чаир, Висар Ганиу. Тој, пак, на прес-конференција што ја одржа на 29 мај, кажа дека ако има нешто незаконски во општина Чаир, редно е да постапат органите, а не градоначалничката да ја игра улогата на истражен орган. На 31 мај, Арсовска до Јавното Обвинителство кажа дека доставила документи за дивоградбите во општина Чаир, во надеж, како што кажа, „дека конечно ќе се постапи со цел обезбедување на доказите кои се обидуваат да ги уништат“.
