Домот за деца без родители „11 Октомври“ е добитник на првата награда за најдобар филм во Бари, Италија, на регионалниот фестивал за филм и детски цртажи „Бене мале“ (Bene – Male).
– Премногу сме горди и среќни за успехот на филмот на нашите дечиња од домот. Фестивалот традиционално се одржува секоја година во Италија и е посветен на децата, нивниот развој, на детството. На фестивалот се претставивме со филмот „Два света“, кој ни донесе голем успех и признание – вели Ристенка Атанасова, директор на домот „11 Октомври“.
Победничкиот краток филм децата од домот го снимија заедно со своите воспитувачки на зададена тема од организаторите „Здрава љубов – болна љубов“, кој го носи името „Два света“, а ја разработува темата за животот на едно девојче во домот за деца без родители и животот на друго девојче во сопствен дом со своето семејство. Покрај учеството во филмскиот дел на фестивалот, беа претставени и цртежи од децата, а претставниците од домот учествуваа и во трибина на тема семејно насилство.