Кичевската болница е подготвена да се справи со корона вирусот, велат локалните доктори. Издвоен е посебен објект со две соби каде што во период од 48 часа ќе се сместуваат оние пациенти за кои се прават анализи за Ковид-19. Докторот Илми Мехмеди од инфективното одделение на кичевската болница апелира до граѓаните да не паничат, известува „Порталб.мк“.
Докторот Мехмеди изрази оптимизам дека оваа ситуација ќе помине и го повикува народот да не шири паника бидејќи како што вели тој, единствената причина поради која ситуацијата е дојдена до тука е тоа што ова е нов вирус и е непознат за светот, а не затоа што е многу опасен.
– Јас сум во пензија, но одам на одделот за заразни болести за да им помогнам на колегите бидејќи гледам непотребна паника кај луѓето. Засега нема голем прилив на луѓе кои доаѓаат во нашиот оддел за контрола. Повторувам, нема простор за паника, но неопходно е луѓето да бидат свесни за симптомите, па доколку имаат температура над 38, анамнеза или пак имале контакт со луѓе кои доаѓаат од места кои се во црвената зона, тие дефинитивно треба да бидат контролирани и проверени – вели докторот Илми Мехмеди.
Џабир Бајрами, директор на кичевската болница, е оптимист дека тие се подготвени да се справат со корона вирусот.
– Ситуацијата на територијата на општина Кичево до овој момент е стабилна, ова го велам затоа што официјално немаме ниту едно лице заразено со корона вирус. Ние како болница постојано ја следиме ситуацијата и преземавме посебни мерки за борба против неа. Респираторни апарати немаме, но доколку на некој пациент му треба, истиот ќе биде пренесен во Скопје. Денес успеавме да добиеме двособен објект каде што пациентите ќе бидат задржани 48 часа додека не дојдат резултатите – истакна директорот на кичевската болница Џабир Бајрами за „Порталб.мк“.
