Јавното претпријатие за државни патишта догодина планира да ги реконструира автопатските делници Хиподром – Миладиновци, Миладиновци – Петровец и Петровец – Хиподром. Автопатските влезови во Скопје од исток се со вкупна должина од 28 километри, а за нивната реконструкција се обезбедени средства со заем од Европската банка за обнова и развој (ЕБОР).
– Очекуваме во септември/октомври распишување на тендер за изградба и во текот на 2020 година комплетирање на сите градежни работи – велат за „Мета.мк“ од ЈП за државни патишта.
Проектантското биро „Простор“ од Куманово во моментов работи на проектната документација за планираната реконструкција на трите делници, за што се одвоени средства во висина од над 9,2 милиони денари.
Коловозот на трите автопатски делници на влезот во Скопје е во лоша состојба. Покрај брановиден асфалт, на дел од коловозот има дупки, што го отежнува одвивањето на сообраќајот. Истовремено, овие три делници од патните Коридори 8 и 10 имаат висока фреквенција на возила, при што делницата Петровец – Хиподром во 2017 година била најфреквентен патен правец во земјава со измерен просечен годишен дневен сообраќај од 16.099 возила.
