Извор на фотографија: President.gov.ua, CC BY 4.0, https://commons.wikimedia.org/w/index.php?curid=117050387

Украинскиот заменик министер за одбрана, Вјачеслав Шаповалов си поднесе оставка на функцијата, по медиумските обвинувања за корупција, иако и тој и украинското Министерство за одбрана тврдат дека се неосновани, пренесува Гардијан. Шаповалов беше одговорен за снабдување на украинските војници со храна и воена опрема, а од Министерството за одбрана велат дека неговата оставка сепак е достоен чин што ќе овозможи да се задржи довербата кон ова министерство од граѓаните.

Оставка од функцијата од претседателскиот кабинет на Володимир Зеленски си даде и Кирило Тимошенко, кој беше заменик-шеф на претседателскиот кабинет. Станува збор за еден од клучните соработници на претседателот Зеленски во сиот изминат период, кој беше обвинет во скандалот со користење на скапи автомобили. Пред една недела, оставка на функцијата советник на украинскиот претседател Зеленски си даде Олексиј Арестович.

Инаку, по корупциски скандал вчера од функцијата беше сменет заменик министерот за инфраструктура Васил Лозински, кој беше уапсен од украинската полиција за наводно примање на мито во износ од 400.000 евра.

Денеска од својата функција беше сменет и украинскиот заменик јавен обвинител, Олексеј Симоненко, соопшти украинското јавно обвинителство.

И покрај бројните промени во украинското раководство, на терен и изминатово деноноќие продолжија воените дејствија во Украина. Руските сили го гранатирале градот Купјанск во Харкивскиот регион, што довело до опожарување на станбени згради, пренесува Укринформ.

Гардијан јавува дека како резултат на руските напади врз населени места во Донецкиот регион во изминативе 24 часа загинале најмалку тројца цивили, а уште три лица се повредени. Украинските власти соопштија дека во рамки на ноќна противвоздушна битка во источниот дел на земјата, единиците на противвоздушните ракетни сили уништиле три руски хеликоптери Ка-52.