Доцни испораката на инсулини и антидијабетична терапија по инсулинските аптеки, објави Сојузот на здруженија на дијабетичари и побара итно Министерството за здравство и Владата да им ја обезбедат терапијата.
Претседателотна Сојузот, Диме Велев, за Мета.мк вели дека во моментов со овој проблем се засегнати околу 2.000 дијабетичари.
„Минатата недела со проблемот бевме засегнати околу 400-500 пациенти, а сега веќе сме 2.000. Имаме резерви и ние си ги делиме меѓусебно, си помагаме, но тие резерви се трошат. Затоа бараме надлежните веднаш да започнат испораката на лековите во болничките аптеки“, вели Велев.
Сега, се случува, како што појаснува тој, пациентот да оди по инсулин препишан од ендокринолог, а во аптеката да му биде понудена замена од друг инсулин, а не тој кој е препишан од лекар специјалист. Тој вели дека им било ветено дека од понеделникот ќе започне нова дистрибуција на терапија, но до овој момент, таа не е испорачана и е недостапна за пациентите.
„Упатуваме јавен апел до Министерство за здравство и до Владата, да се започне со испорака на сите инсулини и антидијабетична терапија по инсулинските аптеки во целост, согласно потребите и бројот на постоечки пациенти. Апелираме до инсулинските аптеки да не нудат замена на терапија, која исклучиво треба да биде препишана од страна на ендокринолог. Апелираме до нашите членови да си помагаме со позајмици на онаа терапија која ни фали без да прифатиме нејзина административна промена во аптеките. Апелираме до сите засегнати страни да се изнајде начин за испорака на потребната терапија без било какви администартивни решенија или поточно нерешенија кои ќе ја нарушат нашата контрола на шеќерот, а со тоа ќе се наружи и нашето здравје“, наведено е во јавниот апел испратен до медиумите.
Мета се обрати во Министерството за здравство со прашања во врска со овој проблем, но оттаму до објава на овој текст нема одгвор.
