Министерството за здравство информира дека во изминативе 24 часа се регистрирани 29 нови случаи на коронавирус во земјата. Вкупната бројка на дијагностицирани пациенти со КОВИД-19 до денес до 12 часот изнесува 114. Најголем дел од новорегистрираните случаи се во Скопје, вкупно 22. Во Штип се регистрирани 3 нови случаи, 2 во Дебар и по 1 во Куманово и Охрид.
Според местото на живеење, досега случаи на КОВИД-19 во нашата земја се регистрирани во: Скопје (65), Дебар (36), Штип (7), Кавадарци (2), Охрид (2), Гостивар (1), Куманово (1), соопштуваат од Министерството за здравство.
На Клиниката за инфективни болести и фебрилни состојби во моментов се хоспитализирани 24 пациенти. 7 пациенти се континуирано на третман со кислород, 11 се веќе во стабилна – добра здравствена состојба. Утре, по истекот на 14 дена од поставување дијагноза, кај 6 пациенти ќе се зема контролен брис. Од нив 5 се во добра состојба. Кај пациентката кај која имаше влошување нема промена на состојбата и таа сѐ уште е на респираторна машина. Пациенти кои се на домашно лекување се во постојан контакт со лекарите, посочуваат од министерството.
