Кратењето на околу 100 милиони евра од фондовите ИПА 2, пари кои се наменети за развој на неколку сектори, веќе утврдени меѓу Владата и Европска комисија уште во 2014 година, е резултат на тоа што како држава ништо не сме направиле за да се искористат тие пари, смета пратеничката на СДСМ, Лидија Димова.
Според неа, за развој на секој од тие сектори, потребно е да се направи стратегиски и акциски план и среднорочен седумгодишен буџет, без што не може да се одобрат средства, односно да се добие финансиска согласност за користење на европските пари.
– Ако како држава немате стратегиски план, кој треба да му го дадете на специјален државен службеник, а кој треба да изработи проект врз основа на што ќе се користат европските пари и притоа не изработувате среднорочен буџет од седум години како што ви се бара, упатувате порака дека немате волја за искористување на тие пари, а ниту имате државен и административен капацитет да ги искористите понудените пари. Фондовите ИПА 2 се со временска рамка од 2014 до 2020 година и голем дел од проектите не се влезни ниту во административна процедура за да почнат да се реализираат – појаснува Димова.
Таа додава дека ако како држава се испраќа порака дека не сте способни да ги апсорбирате ИПА-средствата, кредитите од другите финансиски институции ќе бидат поскапи, а кажувате и дека сте ризични како држава за кредитирање.
– Главната причина е неискреноста на власта во процесот на евроинтеграциите. Неискористувањето на европските фондови е индикација за движење на работите во државата. Се испраќа порака дека Владата нема административен и апсорпционен капацитет за да ги искористи европските пари, што негативно влијае врз имиџот на државата. Во тој случај и кредитите што ќе ги земете како држава ќе бидат поскапи и кредиторите ќе ве сметаат како ризично подрачје за да ви даваат кредити. Доколку имате голема искористеност на ИПА-фондовите, ќе имате и помалку кредити – вели Димова.
Таа прашува ако државата не може да искористи 640 милиони евра, колку што изнесува сумата за фондовите ИПА 2 (2014-2020 година), тогаш колкава ќе биде неискористеноста за 10 милијарди евра што би ги добила како полноправна членка на ЕУ.
