За само една година невработеноста е намалена за три проценти и се отворени повеќе од 20.000 работни места на ниво на држава, изјави техничкиот премиер, Емил Димитриев, при посетата на Агенцијата за вработување на Република Македонија.
– Ова е голем успех за сите институции кои се вложија во реализацијата. Намалувањето на невработеноста е резултат на повеќе реализирани мерки и политики на Владата. Повеќе институции беа вклучени во оваа активност, но најзаслужна е Агенцијата за вработување – рече Димитриев, кој на средбата им честитал на раководителите на одделенијата за вработување за вложениот труд.
На средбата со премиерот за спроведување на изборите присуствуваа заменик-министерот за труд и социјална политика, Диме Спасов, директорот на Агенцијата за вработување, Влатко Поповски, и раководители на подрачните единици на АВРМ.