По вчера објавените снимки на лидерот на СДСМ, Зоран Заев , во кои, тој тврди, владини функционери местат и фалсификуваат избори, денеска членови на Државната изборна комисија изјавија дека в понеделник ќе разговараат за темата на седница на комисијата, објави „Нова ТВ“.
Актуелниот претседател на ДИК, Никола Рилкоски, во изјава за медиуми, вели дека не е информиран за снимките и не ја слушнал содржината на разговорите. Тој посочува и дека тоа се снимки кои се однесуваат на локалните избори во 2013 година, кога на чело на ДИК е Борис Кондарко.
Дел од актуелните членови на ДИК велат дека комисијата треба да се состане в понеделник и да заземе официјален став.
Без коментар во врска со снимките е и Борис Кондарко, како поранешен претседател на Државната изборна комисија.