Државната изборна комисија (ДИК) не очекува голема бројка граѓани кои ќе се пријават за промена на податоците во избирачкиот список. Оттаму велат дека според практиката од минатите изборни години, тој број е мал и без поголеми шанси да направи радикални промени во избирачкиот список. Сепак, за тоа дали ќе се објават бројките на граѓани кои поднеле барање за бришење на податоци или за пријавување како гласачи, треба денеска да одлучи комисијата на јавна седница, чие одржување се одложува неколку дена.
На последните избори во 2014 година, повеќе од 110.000 граѓани го искористиле своето право и направиле увид за тоа дали се наоѓаат на избирачкиот список. Повеќе од 75.000 избирачи проверката ја направиле преку интернет. Уште 40.000 граѓани проверката ја направиле лично преку подрачните единици на ДИK.
Од денеска, пак, според роковникот на Државната изборна комисија, сите заинтересирани граѓани на Република Македонија кои се на привремена работа или престој во странство, имаат право да поднесат листа на кандидати за избор на пратеници во Собранието на Република Македонија за изборната единица број 7.
Рокот за собирање потписи пред ДИК, односно во подрачните одделенија, како и во ДКП, е од 25 април до 9 мај 2016 година.
Од вчера ДИК го стави на јавен увид избирачкиот список. Граѓаните, наредните 15 дена може да проверат дали ги има на списокот електронски, на веб-страницата на ДИК, или лично, во подрачните одделенија на комисијата.
Рокот за проверка е 15 дена. Увидот во избирачкиот список може да се изврши секој ден од 8.30 до 19 часот во подрачните одделенија на ДИК, додека проверката на веб-страницата на Комисијата се врши само со матичен број.
