Државната изборна комисија (ДИК) вечерва едногласно одлучила, за основаноста на стотиците пријави од страна на граѓаните да пресече откако ќе заврши вкрстената проверка на податоците од институциите, јавува телевизија „Телма.“
– Ова се однесува на пријави на граѓани на лица кои не живеат на таа адреса, се отселени или се во странство. Иако лицето е на времена работа подолго од три месеци или една година, тоа пак има право да биде запишано во избирачкиот список и таквите лица се обележани со ѕвездичка – изјавил Атанас Урумов, член на ДИК.
Пријавите за починати лица кои ги има во избирачкиот список, ДИК ќе ги проверува во Управата за водење матични книги, а оние за одземена деловна способност во Основните судови низ државата. Исто така, во надлежните иснтитуции ќе се проверува и дали во списокот има малолетни лица или лица кои не се државјани на Македонија.
– Иако избирачкиот список се води по регистарот на државјани на РМ, сепак и по овој основ барам ДИК преку својата стручна служба да изврши увид во регистарот на државјани на РМ, кој се води во МВР и за истото повратно да ја извести ДИК – реагираше Урумов.
