Tрогателнoто играно деби на писателот и режисер Георги М. Унковски, „Диџеј Ахмет“, собира бројни позитивни рецензии. Филмот синоќа премиерно беше прикажан на фестивалот „Санденс“ во Парк Сити, Јута, во конкуренција за награди на програмата Светски филм. „Холивуд репортер“ пишува рецензии и за македонски филмови, а филмот го оценува како инспиративна приказна за созревањето.
„Во средина во која религијата и традицијата доминираат и кај младите и кај постарите, 15 годишниот овчар спасот од секојдневието го наоѓа во електронската музика. Тоа му помага да го издржи гневот на неговиот строг и доминантен татко, како и да се поврзе со девојка која е ветена на некој друг“, пишува „Холивуд репортер“.
„Диџеј Ахмет“ е драма со примеси на комедија за момчето Ахмет од јуручко село во Источна Македонија, кое наоѓа прибежиште во музиката и сонува да стане диџеј додека се справува со очекувањата на татко му, конзервативната заедница и неговото прво искуство со љубовта – девојка која веќе му е ветена на некој друг.
Филмот е копродукција помеѓу „Синема футура“ и „Сектор филм“ од Македонија, „Алтер вижн“ и „Аналог вижн“ од Чешка, „Бекрум продукција“ и „Баш Челик“ од Србија. Продуценти на филмот се Иван Унковски и Ивана Шекуткоска.
Филмот е снимен со 23,5 милиони денари од Агенцијата за филм за 2020 година, а доби поддршка и од 160 илјади евра на паневропскиот филмски фонд „Еуримаж“.
