Соединетите Американски Држави (САД) ги интензивираат дипломатските напори за ставање крај на „пеколот“ на граѓанската војна во Сирија и покрај зголемувањето на нејзината поддршка на умерените бунтовници, изјавил американскиот државен секретар, Џон Кери, пренесува „Би-Би-Си“.
Кери патува за Виена, на состанокот посветен на ставањето крај на четири и полгодишниот конфликт во Сирија. На состанокот ќе учестуваат министрите за надворешни работи на западните сили, Русија, Саудиска Арабија, Турција и други земји од Блискиот Исток.
Првпат учесник на ваквите разговори ќе биде и Иран.
Инаку, Русија и Иран се страната што го поддржува сирискиот претседател, Башар ал-Асад, додека САД, Турција, Саудиска Арабија и уште неколку други арапски земји, се против тој да има влијание на иднината на неговата земја на подолг рок.
Како што пренесува „Би-Би-Си“, шефовите на дипломатиите на Велика Британија, Франција, Германија, Египет, Либан и на Европската унија, исто така, го потврдиле своето учество на состанокот.