Џамиските одбори од Источна Македонија денеска соопштија дека застануваат на страната на, како што велат, новото раководство на ИВЗ под водство на скопскиот муфтија Ибрахим Шабани, кој во понеделникот оваа недела, со своите приврзаници, ја презеде контролата на седиштето на ИВЗ во Скопје.
„Денеска присутните џамиски одбори од Источна Македонија, кои се собраа во централната џамија „Кадин-ана“ во Штип, безрезервно го подржуваат новото раководство на Исламската верска заедница, под водство на скопскиот муфтија Ибрахим Шабани. Се надеваме дека новото раководство ќе ја извади ИВЗ од кризата во која сè подлабоко тонеше оваа институција во изминатиот период. Исто така, ги повикуваме сите муфтии да го чујат гласот на своите џамиски одбори низ Македонија и во таа насока да постапуваат како нивни претставници во ријасетот. Воедно, ги повикуваме и ги охрабруваме сите џамиски одбори низ Македонија, исто како нас, на мирен и достоинствен начин да ја искажат довербата на новото раководство, со што ќе ги принудат нивните муфтии да постапуваат по нивната волја во џамаатот, а не под диктат и пристисок на старото раководство на ИВЗ на чело со поранешниот реис Сулејман Реџепи“, стои во соопштенито на џамиските одбори од Источна Македонија.
Тие бараат и повлекување од функцијата на штипскиот муфтија, бидејќи, според нив, неговата поддршка за донесените одлуки во ријасетот не била од името на џамиските одбори, туку биле негови „лични ставови“.
„Заради овие причини и поради веќе длабоката старост на муфтијата Исламили, бараме од него да се пензионира и со тоа да се повлече од муфтиската должност. Во спротивно, џамиските одбори од Источна Македонија ќе бидат принудени да преземат порадикални мерки бидејќи веќе не сакаме да нè претставува човек во ријасетот кој е наметнат и со сила држен кај нас од поранешниот реис“, се вели во соопштението.
Штипското муфтивство својот став ќе го соопшти утре, на прес-конференција. Денеска во краткото соопштение оттаму тврдат дека сите џамиски одбори се оградиле од таа декларација што ја прочита мутевелијата на штипската џамија Џевџет Зејнелов. Одборите ја откажале подршката на таа декларација, со исклучок на штипскиот и радовишкиот џамиски одбор.
– Воедно ве информираме дека сите имами од Источна Македонија се во комплетно единство за подршката на Реис ул Улема Сулејман Реџепи. Освен што ја осудуваме оваа вандалистичка група бараме веднаш да ги напуштат просториите на ИВЗ – соопштија од штипското муфтиство.
В.К.
