Претседателот на Собранието, Талат Џафери, го информирал еврокомесарот за проширување и за соседска политика, Јоханес Хан, за тековните и за претстојните активности на Собранието на Република Македонија поврзани со реформските процеси, неопходни за добивање позитивна препорака за почнување преговори за членство во Европската Унија, информираат од кабинетот на Џафери.

„Од своја страна, еврокомесарот Хан подвлече дека од суштинско значење е донесувањето на закони неопходни за добивање позитивна евалуација на почетокот на следната година и го поздрави односот на претседателот на Собранието кон парламентарната опозиција и позитивните промени во земјата во насока на подготвување позитивен извештај за Република Македонија“, се вели во соопштението.

Претседателот Џафери изразил уверување дека приоритет во работата на Собранието до крајот на годината ќе биде донесувањето на пакетот реформски закони кои произлегуваат од препораките на Прибе.