Од детската клиника во Скопје потврдија дека во вторникот кај нив било донесено деветгодишното дете од Свети Николе, кое починало по неполни два часа.
Како што информираат оттаму, детето било донесено во многу тешка здравствена состојба.
Претходно, од штипската Клиничка болница излегоа со соопштение за смртта на деветгодишното дете.
Како што се наведува во соопштението, детето било донесено на Одделот за детски болести во штипската Клиничка болница на 14 јануари во 18 часот во „тешка општа состојба со засегната свест“.
Здравствените инспектори веќе работат на случајот, уверува директорот на Државниот санитарен и здравствен инспекторат.
„На Клиниката за Детски болести е примено детето во екстремно тешка состојба и веднаш е згрижено од тим специјалисти и доктори на интензивна нега. Државниот санитарен и здравствен инспекторат по мој налог како директор и согласно нашите надлежности, ќе изврши вонреден инспекциски надзор за текот на лекувањето“, изјави д-р Кирил Лазов, директор на ДСЗИ.
