Изминува деветтиот ден од потрагата по директорот на Здравствениот дом во Охрид, М.Д., којшто е осомничен за финансиски криминал тежок повеќе од 7,5 милиони денари. Тој е сè уште е во бегство, а од полицијата нема информации дека му е влезено во трага. И понатаму, претпоставките се дека се крие во земјата. Дознаваме и дека на денот кога се реализирала акцијата за притворање на осомничените, директорот не бил на своето работно место.

Против него и против двајца негови блиски соработници, Управата за финансиска полиција до Основното јавно обвинителство поднесе кривична пријава поради проневера во службата, поттикнување, помагање и фалсификување или уништување на деловни книги. Тие се товарат дека кривичните дела ги извршиле во периодот од 2010 до 2014 година.

Двајца од пријавените се во притвор, додека по првопријавениот е распишана потерница. Од Секторот за внатрешни работи во Охрид само додават дека интензивно се работи на случајот и на пронаоѓање на осомничениот лекар-директор.

По спроведената детална истрага, Управата за финансиска полиција утврди дека во периодот 2010-2014 година во Здравствениот дом во Охрид се проневерени вкупно 7.565.302,00 денари, износ за кој ќе одговараат трите пријавени лица.