Во рамките на јануарската програма, Кинотека на Македонија ги кани најмладите и нивните семејства да гледаат филмови од програмата „Кино утро“. Оваа иницијатива, како што информираат во Кинотека, нуди филмско доживување за децата и младите, исполнето со авантури, смеа и инспиративни приказни преку внимателно избрани анимирани и детски филмови.
„Во рамките на програмата, во јануари ќе бидат прикажани „Јон против галаксијата“, „Мечето Падингтон“, „Божиќната магија на животните“, „Кариран нинџа 2“, „Дедо Мраз супер херој“, „Соништата на еден робот“. Програмата има за цел да ги доближи најмладите до филмската уметност и да го разбуди нивниот интерес за киното како посебно доживување. Проекциите не се само забава, туку и можност за учење, развој на фантазијата и градење на емоционална интелигенција“, велат во Кинотека.