Настан во чест на полскиот писател на научна фантастика, сатиричар и футуролог Станислав Лем ќе се одржи денес од 17 часот во Младинскиот културен центар во Скопје, како дел од фестивалот на европска литература „Букстар 2021“ (BookStar 2021).
На настанот „Да зборуваме за Лем“, организиран од издавачката куќа „Антолог“ по повод стогодишнината од неговото раѓање, ќе учествува белорускиот писател Виктор Јазневич, приредувач на книгата „Светот на Станислав Лем“.
Меѓу останатите панелисти се Милица Миркуловска, преведувачка и професорка по полски јазик на Филолошкиот факултет во Скопје, како и македонските автори на научна фантастика и сродни жанрови Ивица Дукоски, Зоран Милошевски и Владимир Симовски, додека модератор ќе биде писателот Александар Маџаровски.
Настанот e поддржан од Амбасадата на Република Полска во Северна Македонија, која и го најави преку нивниот профил на Твитер.
📚Срдечно Ве покануваме на средбата посветена на делата на Станислав Лем, која ќе се одржи во рамките на седмото издание на Фестивалот на европската литература „BookStar“ во Младински Културен Центар @MKC_Skopje на 13 октомври 2021 година во 17:00 часот. pic.twitter.com/CstQHbLNjL
— Polish Embassy in North Macedonia (@PLinNMacedonia) October 12, 2021
Според мотивите на најпознатиот роман на Лем „Соларис“, советскиот режисер Андреј Тарковски во 1972 година го сними истиоимениот филм, кој е достапен за гледање онлајн преку веб-сајтот на руската компанија „Мосфилм“ (со опции за превод преку титл).
Станислав Лем (1921-2006) е еден од најпреведуваните полски писатели кој имаше култен статус и во рамки на југословенската супкултура на научна фантастика, кога широк круг на читатели го сметаше за еден од бардовите на жанрот на светско ниво, рамо до рамо со Исак Асимов и Артур Кларк.