Денеска, во 18 часот, пред Специјалното јавно обвинителство, граѓаните обединети во „Шарената револуција“ ќе протестираат против, како што велат, самоволието и авторитарното и корумпирано владеење.
„Ние, македонските граѓани веќе не чувствуваме страв, туку само огорченост, гнев и бес од авторитарното и корумпирано владеење! Како и минатата година, и сега режимот покажува дека не знае како да се справи со протестите! Се закануваат, заплашуваат, апсат и тепаат! Но, ние не им се плашиме и сме уште помотивирани да бидеме помасовни и погласни, низ цела Македонија, секој ден и секоја ноќ! Ако транзицијата ја осиромаши Македонија, оваа власт ја закопа! Оваа власт ги уништи граѓанските и политичките слободи и правото на слободно изразување, но, пред сè, ја уништи шансата на луѓето чесно да си го заработат лебот и да си го живеат животот! Самоволието на политичкиот и бизнис-картел на власт, таа владејачка каста составена од корумпирани и од арамии, го претвори чесниот работен народ во трет сталеж кому му преостанува само улицата! Протестираме против грабежот на богатите врз сиромашните, против извршителското самоволие и за Македонија во која сите ќе можеме чесно да работиме, да заработуваме и да имаме достоинствен живот!“, пишува во најавата за настанот на „Фејсбук“.
Протести од 18 часот ќе се одржат и во Радовиш, Делчево и во Кичево. Од 18.30 часот ќе се протестира во Валандово, Велес и во Прилеп. Од 19 часот ќе се протестира во Струмица и во Битола, а од 19.30 часот – во Гевгелија.
