По кратка пауза, денеска стартува новата сезона на емисијата за млади „Шорткат“. Времето на емитување останува исто, секој четврток со почеток од 19 часот, а емисијата ќе можете да ја гледате на сите канали на Мета.мк и рубриката Цтрл-З на социјалните мрежи, и тоа на: ТикТок, Инстаграм и Фејсбук. Како и досега, покрај на македонски јазик, емисијата „Шорткат“ ќе се емитува и на албански јазик на социјалните мрежи на Порталб.мк, секој четврток со почеток од 20 часот.
Главна тема во 81-та епизода на „Шорткат“ ни е најновиот изум – надворешен прочистувач на воздух од ПМ-10 честички на македонскиот иноватор Ивица Поцков. Покрај решението што го нуди неговата иновација во однос на аерозагадувањето, во емисијата информираме и за оценувањето на слабите страни на училиштата од страна на Државниот просветен инспекторат.
Во „Шорткат“ информираме и за средношколскиот настан „СРЕДНОЛЕНД“ кој деновиве се одржува во Скопје, но и за првата филантропска атлетска трка што викендов се одржа во Штип.