Потписниците на Повелбата за солидарност на синдикатите и на здруженијата за заштита на работничките права денеска во 18 часот пред Дом на градежници ќе организираат протестен марш.

„Постојаното погазување на правата и на достоинството на работниците е една од клучните неправди што ги живееме. Заедно да го кренеме гласот на протестен марш. Повикуваме на здруженост во борбата за поголеми права и за подобри услови за работа. Веруваме дека само преку соработка и работничка и синдикална солидарност, можеме да се спротиставиме на притисокот на актуелните антиекономски и антисоцијални политики“, се вели во најавата за протестот.

Граѓанската иницијатива „Протестирам“ ќе го поддржи овој протест, а од утре ќе продолжи и „Шарената револуција“ со протестите против одлуката на претседателот Ѓорге Иванов да помилува 56 политичари и нивни соработници.