Група граѓани, извикувајќи „убијци“, „доста беше молк“, „кого браните“, „оставка“, „ќе одговарате“ и друго, протестираат пред Владата револтирани од прикривањето на убиството на Мартин Нешковски. Тие го пробија полицискиот кордон и се упатија накај Владата.
Во групата која се обиде да влезе во Владата за да разговараат за снимките беа и мајката и братот на Нешковски.
Како што јавува репортерот на „Мета“, демонстрантите ги спуштиле на пола копје знамињата пред Владата и фрлаат со јајца, јаболки и со балони со вода кон објектот.
Специјални полициски единици го блокираа влезот кон владата за групата демонстранти да не може да влезе внатре.
На протестот се пуштаат и аудиоснимките од денешната „бомба“ посветена токму на убиството на Нешковски.
Сè повеќе граѓани се собираат пред Владата, а на протестот пристигаат и дополнителни полициски сили.
На новинарите кои известуваа од прес-конфренцијата на министерката Гордана Јанкулоска не им беше дозволено да излезат од главниот влез, туку беа принудени да си одат преку подземната гаража.
