Советничката група на СДСМ и на коалицијата во Град Скопје денеска алармира за состојбите во депонијата Дрисла, укажувајќи дека таму има опасен отпад, но и дека концесионерот ФЦЛ од Италија прибира приходи, иако ништо не инвестирал.

– Побаравме информација за степенот на инвестирање, но и за начинот на експлоатирање на овој комунален објект, со кој стопанисува странски партнер  преку јавно-приватно партнерство, кое е без завршена постапка – рече на прес-конференција Драги Давчевски, координатор на советничката група на СДСМ и на коалицијата во Град Скопје.

Од советничката група додаваат дека побарале и дале можност да се дополни информацијата со вистинити докази во однос на тоа дали на депонијата има или нема складирање или третирање со спалување на опасен индустриски отпад од увоз.

– Во рамките на информацијата се потврди дека концесионерот и по четири години нема инвестирано ниту едно евро во Дрисла, но сепак инкасира профит од работењето – посочи Давчевски.

Тој побара да се преиспита одлуката за јавно-приватно партнерство со ФЦЛ поради неисполнување на договорот од 2013 година и го повика Основното јавно обвинителство да отвори истрага врз основа на допрен глас и да утврди дали Дрисла се користи за незаконити цели.