Капитенот на хрватската фудбалска репрезентација и играч на украинскиот „Шахтјор“, Дариjо Срна подари 20 тона мандарини на децата во Донецк, град во Источна Украина каде се водат борби меѓу проруски бунтовници и украинските сили, соопшти клубот од Донецк.
– Кога бев дете во Хрватска, ми беше потребна помош. Особено е важно луѓето да ве поддржуваат кога минувате низ тежок период. Донецк и целиот регион Донбас дадоа многу, а ова овошје е само мал подарок со кој сакам да возвратам – рече Срна.
– Го ценам Донецк, тоа е мој град во кој живеам веќе 11 години и на кој многу му должам затоа што во него созреав како играч и како личност. Моите родители, клубот и неговиот претседател ме научија да им помагам на луѓето во тешка ситуација. Тоа е мојот животен принцип – додаде Срна.
Донацијата на капитенот е една од многуте хуманитарни акции во кои се вклучени играчите на „Шахтјор“.