Со првата поголема група туристи од Данска, во Охрид е отворена туристичката претсезона. Тие престојуваат во охридскиот хотел „Тино“, каде беа пречекани со погача, локум и со македонска ракија, а беше послужено и охридско ѓомлезе.

Данците, видно изненадени од гостопримливиот пречек, рекоа дека за Охрид и за Македонија се информирале преку интернет. Првата група дански туристи во Македонија ќе престојува 22 дена.

Од охридската туристичката агенција „Вис пој“, велат дека како тур-оператор што донесува гости од странство, веќе трета година реализираат туристички аранжмани со дански туристи во Македонија.

– Минатата година остваривме околу 3.000 ноќевања на дански туристи, а оваа година очекуваме да оствариме околу 5.000 ноќевања. Дел од групите со дански туристи, во Охрид ќе престојуваат во април, мај и во јуни, а другите во месеците септември и октомври, со што ќе се обезбеди збогатување и проширување на туристичката понуда надвор од летната сезона – вели Јаким Маленко од туристичката агенција „Вис пој“.

Тој најави дека освен на долги одмори од 22 дена, годинава во Охрид ќе има и групи со дански туристи кои имаат резервирано и седумдневни аранжмани.

Туристите од Данска биле заинтересирани за нашата култура, историските споменици, за природните реткости, а особено за традиционалната македонска храна и за македонските вина. Според туристичките познавачи, Данците се одлични гости и солидни потрошувачи, не се многу пребирливи и сакаат да уживаат во природата и во гостопримливоста.